जनतामाथि कर र जरिवाना थोपर्दा नागरिकको जीवन असुरक्षित भयो: सांसद शाही
काठमाडौं । राष्ट्रिय प्रजातन्त्र पार्टी (राप्रपा) संसदीय दलका नेता ज्ञानबहादुर शाहीले जनतामाथि कर र जरिवाना थोपर्दा नागरिकको जीवन सुरक्षित हुन नसकेको बताएका छन्।
शुक्रबार बसेको प्रतिनिधिसभा बैठकमा मुगुका गणेश नेपालीले आत्मदाह गरेको घटनाबारे सरकारको आलोचना गर्दै शाहीले सरकारले जनतालाई सुविधा दिनुभन्दा कर र जरिवाना असुलीमा बढी ध्यान दिएको आरोप लगाए।
उनले सरकारका ऐन, नीति र नियमहरू पहुँचवाला तथा आर्थिक रूपमा सम्पन्न वर्गको पक्षमा केन्द्रित देखिएको टिप्पणी गरे।
“जसको खल्तीमा पैसा छ, उसले नेपालमा बाँच्न पाउँछ र जसको खल्तीमा पैसा छैन, उसको जीवनको कुनै मूल्य छैन भन्ने सन्देश सरकारका नीति तथा कार्यक्रमले दिइरहेका छन्,” शाहीले भने।
उनले जनताले थेग्न नसक्ने नीति तथा कानुन बनाउन नहुने भन्दै घरबार बेचेर राज्यको जरिवाना तिर्नुपर्ने अवस्था अन्त्य गर्नुपर्ने बताए।
शाहीले गृहमन्त्री सुधन गुरुङको कार्यशैलीको पनि आलोचना गरे। गृहमन्त्री हो कि कन्टेन्ट क्रिएटर ?” भन्दै शाहीले जनताको जीवन बचाउने काम सरकारको प्राथमिकता हुनुपर्ने बताए। उनले गणेश नेपालीको घटनामा समयमै प्रभावकारी उपचार र उद्धार भएको भए अवस्था फरक हुन सक्ने दाबी गरे।
प्रधानमन्त्री बालेन्द्र शाह काठमाडौं महानगरपालिकाको मेयर हुँदा पनि गरिब तथा निमुखा नागरिकले समस्या भोग्नुपरेको शाहीको आरोप थियो। उनले काठमाडौं सहर सबै वर्गका नागरिकको साझा सहर भएको भन्दै कमजोर वर्गको संरक्षणमा सरकार गम्भीर हुनुपर्ने बताए।
जनतामाथि करमाथि कर थपेर समस्या सिर्जना गरिएको आरोप लगाउँदै शाहीले सडक व्यापार गर्ने, ठेलागाडा चलाउने, पठाओ र ट्याक्सीमार्फत जीविकोपार्जन गर्ने नागरिकका लागि सरकारले वैकल्पिक व्यवस्था गर्नुपर्ने माग गरे।
“सडकमा बसेर व्यापार गर्नुपर्छ भन्ने मान्यता छैन, तर उनीहरूका लागि व्यवस्थित स्थान र विकल्प किन दिइएन ? सरकारले यसको जवाफ दिनुपर्छ,” उनले भने।
२०८३ असार २६ गते शुक्रवार १७:३४ बजे प्रकाशित
