गणेश नेपाली आत्मदाह प्रकरणमा वर्षमान पुनको प्रश्न– ‘यो राज्यको असफलता हो कि होइन ?’
काठमाडौं । नेपाल कम्युनिस्ट पार्टी (नेकपा) का सांसद वर्षमान पुन ‘अनन्त’ले मुगुका युवा गणेश नेपालीको आत्मदाह प्रकरणबारे सरकारसँग जवाफ माग गरेका छन्।
शुक्रबार बसेको प्रतिनिधिसभा बैठकमा बोल्दै पुनले गणेश नेपालीको घटनाले आफू स्तब्ध भएको बताए। उनले उक्त घटनाप्रति श्रद्धाञ्जली व्यक्त गर्दै सरकारको भूमिकामाथि प्रश्न उठाएका हुन्।
पुनले इलामका युवा कृषक प्रेम आचार्यले १० माघ २०७९ मा नयाँ बानेश्वरमा आत्मदाह गरेपछि तत्कालीन काठमाडौं महानगरपालिकाका मेयर तथा हालका प्रधानमन्त्री बालेन्द्र शाह (बालेन)ले सामाजिक सञ्जालमा लेखेको अभिव्यक्ति संसद्मा सुनाएका थिए।
उनले भने, ‘गणेश नेपालीको घटनाले स्तब्ध बनाएको छ। उहाँप्रति श्रद्धाञ्जली व्यक्त गर्छु। यस सन्दर्भमा अहिले सामाजिक सञ्जालमा भाइरल भइरहेको प्रधानमन्त्रीज्यूको २६ जनवरी २०२३ को एउटा स्टाटस छोटकरीमा उद्धृत गर्न चाहन्छु।’
त्यसपछि पुनले बालेनको पुरानो अभिव्यक्ति उद्धृत गर्दै आत्मदाहका घटनालाई राज्यको जिम्मेवारीसँग जोडिएको विषयका रूपमा प्रस्तुत गरे।
उनले प्रधानमन्त्री शाहलाई प्रश्न गर्दै गणेश नेपालीको आत्मदाहबारे विगतको धारणा अहिले पनि कायम छ कि परिवर्तन भएको हो भनेर सोधे।
‘प्रधानमन्त्रीज्यू हुनुहुन्छ। नयाँ विश्वासका साथ जनमत लिएर आउनुभएको छ। के यो राज्यको असफलता हो ? या गरिब, दु:खी र सुकुमवासीहरूले संघीय राजधानी वा देशभर बाँच्न नपाउने अवस्था हो ? उनीहरूले गरिखान नपाउने संकेत हो ?’ पुनले प्रश्न गरे।
उनले सरकारलाई घटनाबारे स्पष्ट धारणा सार्वजनिक गर्न आग्रह गर्दै भने, ‘यही दृष्टिकोण आज पनि छ कि सत्तामा पुगेपछि बदलिएको हो ? यसको जवाफ चाहन्छु।’
सांसद पुनले आत्मदाहजस्ता घटनाले राज्यको नीति, सेवा प्रवाह र नागरिकप्रतिको जिम्मेवारीमाथि गम्भीर प्रश्न उठाएको बताए।
२०८३ असार २६ गते शुक्रवार १७:३९ बजे प्रकाशित
