काठमाडौं । सरकारले काठमाडौं उपत्यकाका सडकका पोलमा वर्षौंदेखि गुजुल्टो परेर रहेका तथा प्रयोगविहीन इन्टरनेट, टेलिफोन र टेलिभिजनका तार साउन दोस्रो साताभित्र व्यवस्थापन गर्न सम्बन्धित निकायलाई निर्देशन दिएको छ।

सूचना तथा सञ्चारमन्त्री डा। विक्रम तिमिल्सिना र ऊर्जा, जलस्रोत तथा सिँचाइमन्त्री विराजभक्त श्रेष्ठको संयुक्त उपस्थितिमा बुधबार बसेको बैठकले नेपाल दूरसञ्चार प्राधिकरण, नेपाल विद्युत् प्राधिकरण, नेपाल टेलिकम, एनसेल र इन्टरनेट सेवा प्रदायकहरूलाई समयसीमासहित एकीकृत कार्ययोजना बनाएर काम अघि बढाउन निर्देशन दिएको हो।

पहिलो चरणमा त्रिपुरेश्वर–कालिमाटी–कलङ्की, जडीबुटी–पेप्सीकोला, त्रिपुरेश्वर–लाजिम्पाट, सामाखुशी–टाउन प्लानिङ–गोंगबु, कीर्तिपुर तथा पुरानो बानेश्वर–गौशाला–चाबहिल क्षेत्रमा अव्यवस्थित र प्रयोगविहीन तार हटाइनेछ।

बैठकले सबै सेवा प्रदायकलाई आफ्ना तारमा अनिवार्य रूपमा पहिचान खुल्ने ट्याग राख्न पनि निर्देशन दिएको छ। सञ्चारमन्त्री तिमिल्सिनाले अव्यवस्थित तार व्यवस्थापनमा तत्काल परिणाम देखिने गरी काम गर्न आग्रह गरे भने ऊर्जामन्त्री श्रेष्ठले दीर्घकालीन समाधानका लागि निकायबीच प्रभावकारी समन्वय आवश्यक रहेको बताए।

सेवा प्रदायकहरूले वर्षायाम, तारको स्वामित्व पहिचान गर्न कठिनाइ र सडक क्षेत्रमा काम गर्ने समयको सीमितताका कारण काममा ढिलाइ भएको बताएका छन्। नेपाल टेलिकम र एनसेलले भने तार व्यवस्थापन र ट्यागिङको कामलाई तीव्र बनाउने प्रतिबद्धता जनाएका छन्।

२०८३ असार ३१ गते बुधवार १७:२१ बजे प्रकाशित