उचित मूल्य नपाएको भन्दै किसानले फ्याँके माइतीघरमा मण्डलामा गोलभेँडा
काठमाडौं । उत्पादनको उचित मूल्य नपाएको भन्दै किसानहरुले काठमाडौंको माइतीघर मण्डलामा गोलभेँडा फ्याँकेर विरोध प्रदर्शन गरेका छन्।
आज बिहान माइतीघर मण्डला क्षेत्रमा भेला भएका किसानहरुले आफूहरुले उत्पादन गरेको गोलभेँडा सडकमा पोख्दै सरकारको ध्यानाकर्षण गराएका हुन्।
किसानहरुले उत्पादनको लागतअनुसार मूल्य नपाएको, बजारमा बिचौलियाका कारण किसान मारमा परेको भन्दै प्रदर्शन गरेका हुन्। प्रदर्शनमा सहभागी किसान बम तामाङले किसानको उत्पादनले उचित मूल्य नपाएको र बिचौलिया हटाउनुपर्ने मागसहित आन्दोलन गरिएको बताए।
उनका अनुसार प्रदर्शनका लागि किसानहरुले आफ्नै कृषि फार्मबाट गोलभेँडा ल्याएर माइतीघरमा पोखेका थिए।
प्रदर्शनका क्रममा किसानहरुले गोलभेँडा तथा अन्य तरकारीको न्यूनतम समर्थन मूल्य तोक्नुपर्ने, कृषि बिमा प्रभावकारी रूपमा लागू गर्नुपर्ने लगायतका माग राखेका थिए। उनीहरुले विभिन्न माग लेखिएका प्लेकार्डसहित सरकारविरुद्ध नाराबाजीसमेत गरेका थिए।
किसानहरुले कृषि उत्पादनको उचित बजार व्यवस्थापन, मूल्य सुनिश्चितता र किसानमैत्री नीति कार्यान्वयन गर्न सरकारसँग माग गरेका छन्।
२०८३ असार ३१ गते बुधवार १७:२६ बजे प्रकाशित
