काठमाडौँ । स्वास्थ्य तथा खाद्य स्वच्छता मन्त्रालयले स्वदेशी औषधी उत्पादनलाई सुदृढ बनाउने उद्देश्यसहित नेपाल औषधी लिमिटेडमार्फत आगामी दुई वर्षभित्र ३६ प्रकारका अत्यावश्यक औषधी उत्पादन गर्ने तयारी गरेको छ।

यसका लागि मन्त्रालय र नेपाल औषधी लिमिटेडबीच समझदारीपत्र ९एमओयू० गर्ने प्रक्रिया अघि बढाइएको मन्त्रालयले जनाएको छ। हाल नेपाल औषधी लिमिटेडबाट ११ प्रकारका अत्यावश्यक औषधी उत्पादन हुँदै आएको छ।

मन्त्रालयका अनुसार आगामी चरणमा उच्च रक्तचाप, मधुमेहलगायत दीर्घरोगका औषधीसमेत नेपाल औषधी लिमिटेडबाट उत्पादन गर्ने योजना छ। त्यसका लागि आवश्यक अनुसन्धान तथा विकास, गुणस्तर परीक्षण, उत्पादन अनुमति र प्राविधिक तयारीलाई तीव्रता दिइनेछ।

कार्यक्रम प्रभावकारी रूपमा कार्यान्वयन गर्न आवश्यक बजेट व्यवस्थापन गर्ने तथा सरकारी स्वास्थ्य संस्थामा आवश्यक पर्ने अत्यावश्यक औषधीको आपूर्तिमा स्वदेशी उत्पादनलाई प्राथमिकता दिने नीति मन्त्रालयले अघि सारेको छ।

समझदारी कार्यान्वयनमा आएपछि सरकारी स्वास्थ्य संस्थाका लागि आवश्यक औषधी खरिद प्रक्रिया स्वास्थ्य तथा खाद्य स्वच्छता मन्त्रालय र नेपाल औषधी लिमिटेडबीच सहज, नियमित र संस्थागत प्रणालीमार्फत सञ्चालन हुने व्यवस्था मिलाइने जनाइएको छ।

यसबाट सरकारी औषधी खरिद प्रक्रिया थप प्रभावकारी बन्नुका साथै नेपाल औषधी लिमिटेडबाट उत्पादित औषधीको सुनिश्चित प्रयोग र बजार विस्तारमा समेत सहयोग पुग्ने अपेक्षा गरिएको छ।

मन्त्रालयले नेपाल औषधी लिमिटेडबाट उत्पादन हुने सबै औषधीको गुणस्तर राष्ट्रिय तथा अन्तर्राष्ट्रिय मापदण्डअनुसार सुनिश्चित गरिने जनाएको छ।

मन्त्रालयका अनुसार यो पहलले स्वदेशी औषधी उद्योगको प्रवर्द्धन, औषधीमा आत्मनिर्भरता वृद्धि, आयातमा निर्भरता घटाउने तथा नागरिकलाई गुणस्तरीय र सुलभ अत्यावश्यक औषधी नियमित रूपमा उपलब्ध गराउने सरकारी लक्ष्यलाई थप बल पुग्नेछ।

२०८३ साउन २ गते शनिवार १७:१५ बजे प्रकाशित