पोहोरभन्दा बढी संख्यामा मान्छे विदेश जाँदा अहिले सबै चुपचाप छन् : अध्यक्ष ओली
काठमाडौं । नेकपा (एमाले)का अध्यक्ष तथा पुर्व प्रधानमन्त्री केपी शर्मा ओलीले विदेश जाने नेपाली युवाको संख्या अघिल्लो वर्षको तुलनामा अहिले बढेको भए पनि त्यसबारे कसैले चर्चा नगरेको टिप्पणी गरेका छन्।
आइतबार एमालेका सांसदहरूका लागि आयोजित अभिमुखीकरण कार्यक्रममा बोल्दै अध्यक्ष ओलीले अघिल्लो वर्ष वैदेशिक रोजगारीका विषयलाई लिएर व्यापक आलोचना भएको स्मरण गराउँदै अहिले भने अझ बढी युवा विदेशिएको तथ्य हुँदाहुँदै पनि मौनता छाएको बताए।
“पोहोर यतिबेला ‘विदेश मान्छे पठाइयो, विदेश गए’ भनेर निकै हल्ला गरिएको थियो। तर अहिले पोहोरभन्दा बढी संख्या बाहिर गएको छ, तर सबै चुपचाप छन्,” उनले भने।
उनले अहिले वैदेशिक रोजगारीका लागि विदेश जानु युवाको अधिकार भएको व्याख्या अघि सारिएको उल्लेख गर्दै राजनीतिक स्वार्थअनुसार एउटै विषयलाई फरक–फरक रूपमा प्रस्तुत गर्ने प्रवृत्ति रहेको टिप्पणी गरे।
“पोहोर स्वाभाविक थिएन, अहिले स्वाभाविक भनिएको छ। कुरो र कुलो जता पनि जान्छ भनेजस्तै कतिपयले जनताको हितविपरीत आफ्नो संकीर्ण स्वार्थका लागि विषयलाई बङ्ग्याउने काम गर्छन्,” ओलीले भने।
अध्यक्ष ओलीले यस्ता बङ्ग्याइएका विषयलाई सच्याएर सही सूचना जनतासमक्ष पुर्याउने महत्वपूर्ण माध्यम संसद् भएको बताए। उनले संसद्मा कानुन बनाउने पर्याप्त संख्या नभए पनि जनहितका विषय उठाउने जिम्मेवारी भने निर्वाह गर्नुपर्ने धारणा राखे।
२०८३ साउन ३ गते आइतवार १७:०९ बजे प्रकाशित
