स्थानीय चुनावका लागि रास्वपाको नयाँ मापदण्ड: ‘क्यान्डिडेट क्लब’ र ‘लिडरसिप एकेडेमी’ उत्तीर्ण गर्नुपर्ने
काठमाडौँ । राष्ट्रिय स्वतन्त्र पार्टी (रास्वपा) ले आगामी स्थानीय तह निर्वाचनमा पार्टीको तर्फबाट उम्मेदवार बन्न चाहने सदस्यहरूका लागि नयाँ योग्यता मापदण्ड अनिवार्य गर्ने निर्णय गरेको छ।
आइतबार पार्टी केन्द्रीय कार्यालय वनस्थलीमा बसेको सचिवालय बैठकले उम्मेदवार बन्न इच्छुक सदस्यहरूले ‘क्यान्डिडेट क्लब’ र ‘लिडरसिप एकेडेमी’ दुबै कार्यक्रम उत्तीर्ण गर्नुपर्ने व्यवस्था लागू गर्ने निर्णय गरेको हो।
प्रवक्ता मनिष झाका अनुसार अब स्थानीय तह निर्वाचनमा पार्टीको तर्फबाट उम्मेदवार बन्न चाहने सदस्यहरूले यी दुवै तालिमरकार्यक्रम पूरा गर्नै पर्नेछ।
बैठकमा ‘स्थानीय तह उम्मेदवार छनोट रूपरेखा–२०८३’ को मस्यौदा प्रतिवेदन पनि प्रस्तुत गरिएको थियो, जसलाई उम्मेदवार छनोट प्रक्रिया व्यवस्थित र पारदर्शी बनाउने उद्देश्यले अघि सारिएको बताइएको छ।
सो प्रतिवेदन पार्टी सभापति रवि लामिछाने लाई उम्मेदवार छनोट रूपरेखा निर्माण समितिले औपचारिक रूपमा हस्तान्तरण गरेको पनि बैठकमा जानकारी गराइएको थियो।
रास्वपाले आगामी चुनावमा उम्मेदवार छनोट प्रक्रियालाई प्रशिक्षण, नेतृत्व क्षमता र आन्तरिक मूल्यांकनसँग जोड्दै अघि बढाउने रणनीति लिएको देखिन्छ।
२०८३ वैशाख २० गते आइतवार १७:४६ बजे प्रकाशित
