काठमाडौं । राष्ट्रिय स्वतन्त्र पार्टी (रास्वपा)का सभापति रवि लामिछानेले सञ्चारमाध्यमको कार्यालय प्रवेशद्वारमा अवरोध पुग्ने गरी सवारी पार्किङ गरिएको घटनाको निष्पक्ष छानबिन र दोषीमाथि कारबाही हुनुपर्नेमा पार्टीको अडान स्पष्ट रहेको बताएका छन्।

मंगलबार सिंहदरबारमा सञ्चारकर्मीसँग कुरा गर्दै लामिछानेले उक्त घटनाबारे रास्वपाले यसअघि नै विज्ञप्तिमार्फत आफ्नो धारणा सार्वजनिक गरिसकेको र त्यसमा पार्टी अहिले पनि अडिग रहेको बताए।

“पार्टीले विज्ञप्तिमार्फत यो गलत हो भनेर स्पष्ट भनिसकेको छ। यस घटनाको छानबिन हुनुपर्छ र दोषीमाथि कारबाही हुनुपर्छ भन्ने हाम्रो अडान यथावत् छ,” उनले भने।

उनले ट्राफिक प्रहरीले तत्काल के गर्‍यो वा गरेन भन्ने विषय छुट्टै भए पनि घटनालाई पार्टीले गम्भीर रूपमा लिएको बताए। उनका अनुसार घटनाको प्रकृति अस्वाभाविक देखिएकाले निष्पक्ष अनुसन्धान आवश्यक छ।

“तत्काल कसलाई छोडियो, समातियो वा मुद्दा लाग्यो–नलाग्यो भन्ने अलग विषय हो। तर समग्रमा देखिएको अवस्था अस्वाभाविक भएकाले पार्टीले जारी गरेको विज्ञप्तिअनुसार नै हामी अडिग छौं,” उनले भने।

रास्वपाकै कार्यकर्ता संलग्न भएको पाइए पनि कारबाही हुन्छ कि हुँदैन भन्ने सञ्चारकर्मीको प्रश्नमा लामिछानेले कानुन सबैका लागि समान हुने बताए।

“किन हुँदैन ?रास्वपा आफ्नै सांसदलाई ७२ घण्टाभित्र कारबाही गर्ने पार्टी हो। जो भए पनि, संलग्नता पुष्टि भए कानुनी कारबाही हुनुपर्छ,” उनले भने।

लामिछानेले पछिल्लोपटक काठमाडौं महानगरपालिकाका प्रमुख बालेन्द्र (बालेन) शाहसँग भएको भेटवार्ताबारे पनि जानकारी दिँदै सुकुम्बासी समस्या समाधानका उपाय तथा समसामयिक राजनीतिक विषयमा परिणाममुखी छलफल भएको बताए।

“विशेषगरी सुकुम्बासी समस्या समाधानलाई प्रभावकारी बनाउने विषयमा र अन्य समसामयिक मुद्दामा गम्भीर छलफल भएको छ,” उनले भने।

२०८३ असार ३० गते मंगलवार १७:१३ बजे प्रकाशित