काठमाडौं । करार सेवामा कार्यरत कर्मचारी हटाउने सरकारको तयारीको विरोधमा १८ वटै मन्त्रालयका करार कर्मचारीहरूले धर्ना दिएका छन्।

सरकारले करार सेवामा रहेका कर्मचारीलाई हटाएर आउटसोर्सिङमार्फत कर्मचारी भर्ना गर्ने तयारी गरेको भन्दै मंगलबार सिंहदरबारस्थित अर्थ मन्त्रालयको मुख्य प्रवेशद्वार अगाडि कर्मचारीहरूले विरोध प्रदर्शन गरेका हुन्।

आन्दोलनरत कर्मचारीहरूले सरकारको उक्त निर्णयले लामो समयदेखि करार सेवामा कार्यरत हजारौं कर्मचारीको रोजगारी संकटमा पर्ने बताएका छन्। उनीहरूले करार सेवामा रहेका कर्मचारीको सेवा निरन्तरता सुनिश्चित गर्न र आउटसोर्सिङ प्रणाली लागू गर्ने निर्णय तत्काल रोक्न सरकारसँग माग गरेका छन्।

कर्मचारीहरूले आफूहरूले लामो समयदेखि सरकारी सेवामा योगदान दिँदै आएको उल्लेख गर्दै रोजगारीको सुरक्षा र श्रम अधिकारको सुनिश्चितता गर्न सरकारको ध्यानाकर्षण गराएका छन्।

२०८३ असार ३० गते मंगलवार १७:२० बजे प्रकाशित