प्रतिनिधिलाई तोकिएको पाँच हजार स्वेच्छिक बनाइएको सभापति लामिछानेको घोषणा
चितवन । राष्ट्रिय स्वतन्त्र पार्टी (रास्वपा) का सभापति रवि लामिछानेले महाधिवेशन प्रतिनिधिका रूपमा तोकिएको पाँच हजार रुपैयाँ शुल्क स्वेच्छिक बनाइएको घोषणा गरेका छन्।
भरतपुरमा जारी महाधिवेशनको बन्द सत्रलाई सम्बोधन गर्दै सभापति लामिछानेले शुल्क अब अनिवार्य नभएको स्पष्ट पार्दै पहिले तिरेका प्रतिनिधिहरूले चाहेको खण्डमा रकम फिर्ता लिन सक्ने व्यवस्था रहने बताए।
“प्रतिनिधिका रूपमा तोकेको ५ हजार स्वेच्छिक बनाउन चाहन्छु,” लामिछानेले भने, “यति धेरै दिन बस्दा तपाईंहरूलाई दु:ख भयो होला। चाहनुहुन्छ भने तिरिसकेकाहरूले पनि फिर्ता लिन सक्नुहुनेछ।”
त्यस क्रममा उनले पार्टीभित्र सबैलाई स्वतन्त्र रूपमा उम्मेदवारी दिन आग्रह गर्दै रास्वपा पुराना राजनीतिक दलजस्तो नभएको दाबी गरे। साथै, “यसलाई र उसलाई भोट दिनु” भन्ने मानसिकता राख्ने व्यक्ति रास्वपाको हुन नसक्ने पनि उनले बताए।
लामिछानेले विवेक प्रयोग गरेर ५२ लाख नागरिकले रास्वपालाई शक्तिशाली दल बनाएको उल्लेख गर्दै अब पार्टीभित्र पनि विवेकपूर्ण निर्णय आवश्यक रहेको बताए।
उनले महाधिवेशनलाई सफल बनाउन केही चुनौती भए पनि पूर्व नेताहरूले राजनीतिक दल निर्माणका क्रममा धेरै कठिनाइ भोगेको स्मरण गर्दै आफूहरूलाई दुई दिनको असुविधा मात्र भएको टिप्पणी गरे।
२०८३ असार ९ गते मंगलवार १७:४२ बजे प्रकाशित
